3 жніўня, Брэст /Кар. БЕЛТА/. На раніцу 3 жніўня ў Брэсцкай вобласці намалацілі 1 млн 13 тыс. т збожжа без уліку рапсу. Аб гэтым паведаміў карэспандэнту БЕЛТА старшыня камітэта па сельскай гаспадарцы і харчаванні Брэсцкага аблвыканкама Анатоль Шчуплянкоў.
"Сярэдняя ўраджайнасць складае 40,6 ц/га. У рэгіёне ўбрана 73 працэнты плошчаў - гэта 250,8 тыс. га", - расказаў Анатоль Шчуплянкоў. Столінскі і Пружанскі раёны пераадолелі статысячную мяжу па намалоце збожжа.
Лідарам па ўраджайнасці на ўборачнай кампаніі стаў Столінскі раён, дзе ў сярэднім з аднаго круга атрымліваюць 53 ц. Дарэчы, аграрыі гэтага палескага раёна ўжо завяршаюць жніво. Там засталося ўбраць 7% плошчаў. Набліжаюцца да фінішу ўборачнай і ў Камянецкім раёне (91%).
"У Брэсцкай вобласці практычна завершана ўборка азімага рапсу (98,8%). Намалочана 234 тыс. т. Сярэдняя ўраджайнасць - 32,5 ц/га. Завершана церабленне лёну. Вядуцца работы па падрыхтоўцы глебы пад сяўбу азімага рапсу", - дадаў старшыня аблсельгасхарча.-0-
